لسه فاكرين بلخور قصدى بلفور سنة 1917 اللى قال “انا هبذل كل جهدى لإقامة وطن لليهود فى فلسطين” , هى دى كانت بداية النكبة او الوكسة او المصيبة بتاعت 1948. سنة 1920 قرر الحلفاء انهم يحطوا فلسطين تحت الإنتداب البريطانى “الإنتداب ده شكل من الاستعمار كده” وينفذوا تصريح بلفور المشئوم .. وطبعاً سمحوا لأعداد كبيرة جداً من اليهود انهم يهاجروا من كل مكان فى العالم لفلسطين ويحوّلوا ملكية اراضى العرب لليهود علشان يبنوا عليها مستعمراتهم وقذارتهم .واكيد الفلسطينين مسكتوش وقامت حروب بينهم ومذابح . وبعدين راح اليهود وقفوا جنب الحلفاء فى الحرب العالمية الثانية “اكيد عشان يساعدوهم ويكسبوا تأييدهم فى اقامة وطن لهم فى فلسطين بعد الحرب !” , وطبعا بعد لما الحرب خلصت راحت بريطانيا عارضة الحكاية دى على هيئة الامم المتحدة ووافقتهم على تقسيم فلسطين لدولة عربية ودولة فلسطينية ومنطقة دولية “ازاى توافق على حاجة زى كده اصلا ؟”, طبعا العرب رفضوا تماماً ولما بريطانيا شافت كده قالت انها هتخرج من فلسطين وتنهى انتدابها “مبدأ تمام” , لكن اليهود كونوا عصابتهم المسلحة وطردوا الفلسطينينن من بيوتهم وارتكبوا ابشع المذابح منها مذبحة “دير ياسين” , قامت حرب فلسطين سنة 1948 ودخلت الجيوش العربية مع فلسطين ضد اسرائيل , راحت امريكا اخدت موافقة مجلس الامن على وقف القتال وعقد هدنة بين الطرفين “الهدنة بتقول ان محدش يجيب سلاح او محاربين لمدة شهر “ وطبعا العرب التزموا واليهود خالفوا الهدنة “كالعادة” وعشان كده لما الحرب بدأت تانى ظهر تفوقهم وهزموا الجيوش العربية واستولى اليهود على كل فلسطين ما عدا قطاع غزة والضفة الغربية ,والقدس كانت مقسمة بين العرب واليهود ومن هنا اعلن اليهود قيام دولة اسرائيل فى 15 مايو 1948 وطبعا امريكا اعترفت هيا كمان ” هى تقدر تقول لأه ؟ “ , ولحد انهارده هى دى مشكلة الفلسطينين او مشكلة العرب كلهم ..
كان نفسى اكتب ذكرى استرجاع فلسطين مش ذكرى احتلالها .
بس يا ترى افتكرتوها ولا لسه ؟
بقلم / عمرو رجائي
